May gitago ang kangitngit

Gula 67

Human sa panagsulti nila ni Chief Inspector Dindo Raval, mibalik si SPO1 Nicko Bernal sa iyang opisina. Wala pa gani siya makalingkod, mibagting ang iyang cellphone. Ang 6666 na usab ang nanawag. Iya kini nga gidali pagtubag.

“Ngano nga mura’g masuk-anon ka man, Nicko? Dili ka ba diay gusto nga makadungog sa tingog sa pangulo sa Bangkulis Black Brotherhood?” matud sa babaye.

Nakugang si Nicko sa iyang nadungog.

Nakalitan pag-ayo si Nicko sa gisulti sa misteryoso nga babaye. Gusto niya nga sublion kadto paglitok sa babaye aron maklaro niya ang tanan. “U-unsa kadtong imong gisulti?” ni Nicko pa. “Ikaw ang pangulo sa Bangkulis Black Brotherhood.”

“Oo,” tubag sa misteryosong babaye. “Ug ako ang nagmando sa akong mga alagad sa pagpatay sa mga batang babaye nga natawo sa Septiyembre 8.”

“Punyeta ka,” misaka ang tingog ni Nicko. “Ngano nga inyo kining gibuhat ngadto sa mga bata? Usa ka linuog kining maong buhat.”

“Ang among gibuhat kabahin lang sa doktrina nga gilatid sa among pundok,” nagkanayon ang misteryoso nga babaye.

“Dili makata-runganon kining inyong gihimo,” nagkanayon si Nicko nga nagpaminti sa tumang kasuko. – Sumpayan