Tilaw sa katam-is

Gula 7

Mipagakpak si Shane sa dayon na nga pagtapos ni Arthur sa pagkanta sa Pangandoy. Mibathay sa mga ngabil sa dalaga ang kahimuot nga nakadungog sa mao nga awit.

“Gipaminaw nako’g maayo Art, wa ka g’yuy kalainan sa orihinal nga nagkanta sa Pangandoy nga si Al Comendador,” matud ni Shane nga nagpahiyom. Mura’g mibawos ang dalaga sa pag-ulog-ulo kang Arthur.

“Gipaninguha lang nako nga kahatagan og kinabuhi ang pagkanta sa maong awit kay kinasing-kasing ko nga gipahinungod kanimo ang mga lyrics niadto,” matud sa ulitawo nga mitutok kang Shane uban sa salabtonon kaayo’ng tinan-awan.

Miduko si Shane kay mura’g nakabantay siya nga mipasakalye na si Arthur sa pagpadayag sa iyang pagbati nga gipaagi lang usa sa usa ka awit. Dungan sila nga mitungab sa light beer.

“Tubagon nako ang imong gikanta Art,” matud ni Shane nga mipunit sa song book. “Sige, maminaw ko,” ni Arthur nga mura’g naghinam-hinam kun unsa nga kanta ang itubag ni Shane kaniya.

Tuod, dali ra nga nakit-an ni Shane ang buot niya kantahon. Mipahiyom si Arthur apan mura’g nahilaw . Iyang nasuta nga ang awit ni Claire dela Fuente nga Sayang maoy kantahon ni Shane.

“Sayang, ngayon lang tayo nagkatagpo, ngayon na rin nagkakalayo,” matud sa unang linya sa lyrics sa awit. Nahibulong si Arthur. Minyo kaha si Shane? Ngano nga nakaingon man kini nga Sayang ang ilang panagkita? (Sumpayan)