Tilaw sa katam-is

Gula 6

Nalingaw g’yud sila si Art ug Shane sa pagpuli-puli nila pagkanta. Pulos makahuloganon ang lyrics sa ilang gikanta mao nga mag-iyahay sila paghinuktok kun mokanta na ang usa kanila.

Wala gayud masayop si Art sa pagpangimbitar og karaoke kang Shane tungod kay nindot man kaayo kini nga mokanta.

Human sila makakaon, mibalik pagkanta sila si Shane ug Art, uban sa barkada sa dalaga nga si Lorena.

“Puwede ba Shane nga mo-order ta og light beer?” gisukna ni Art ang dalaga. “It’s up to you.  Maayo hinuon kay aron ta manginit og mogawas pag-ayo ang atong tingog,” matud ni Shane nga nagngisi.

Mi-order si Art og unom ka botelya nga light beer, dayon mipili siya’g laing kantahonon gikan sa song book. “Para nimo ning akong kantahon Shane, paminawa ug sabta pag-ayo ang matag lyrics sa kanta. Gituyo ko nga binisaya ang kanta aron imo g’yud nga masabtan,” matud ni Art.

Pagsugod g’yud og tugtog sa pasakalye sa awit, nakapahiyom si Shane kay nahibaw-an dayon niya nga ang maong kanta mao ang “Pangandoy” nga gipasikat kaniadto ni Al Comendador. Kanunay kini nga madungog ni Shane nga kantahon sa iyang amahan.

Gitutokan ni Shane si Art kay nasabot niya nga ingon sa kinasing-kasing gayud ang pagkanta niini sa Pangandoy. Nahinuktok si Shane sa mga pulong sa awit. “Pangandoy ko ikaw, oh pinalangga. Sa adlaw nga tanan, gihandom ka!”

Gihinay pagpikpik ni Shane ang buko-buko ni Art samtang ang ulitawo nagpadayon sa pagkanta. Gigunitan ni Art ang bukton ni Shane. (Sumpayan)