Pista sa bukid

Wala gayud makasabot si Kenn sa iyang gibati. Wala siya mobati niini kaniadto sa una niya nga girlfriend. Ingon sa haw-ang kaayo ang iyang kinabuhi nga nalayo kaniya si Lyn bisan og sulod pa lang gani sa pipila ka adlaw.

Kanunay nga mopasunding sa iyang kaisipan ang matahom kaayo nga panagway sa dalaga. Ang lamurok kaayo niini nga aping ug ang paraygon kaayo niini nga tinan-awan. Mura’g halos ikamatay ni Kenn ang kamingaw kang Lyn.

Naputol ang halawom niya nga paghanduraw tungod sa lanog kaayo nga pagsirbato sa bus sa unahan nga karsada. Tuod, nahinumdom siya nga alas dies sa gabii na kay mao kini ang sagad iabot sa last trip gikan sa siyudad.

Sa tanto nga paghanduraw ni Kenn sa nahitabo kanila ni Lyn dinhi ning mao nga payag sa miagi’ng Lunes, takulahaw lang siya nga gidagit sa katulogon. Naghigda gihapon si Kenn sa gihigdaan ni Lyn.

Wala tuyoa nga iyang gidamgo ang dalaga. Tam-is kaayo ang iyang damgo kay gihagkan siya ni Lyn. Nahigmata si Kenn tungod sa kaanindot sa iyang damgo. Wala siya magdahom nga tinuod g’yud diay siya nga gihagkan ni Lyn samtang natulog.

“Giingnan ko ni mama nimo nga dia ka dinhi Kenn. Wala na ko makaantos sa kamingaw kanimo didto sa siyudad,” ni Lyn pa.

Nagginaksanay silang duha nga tugob sa kamalipayon nga sa wala damha nagtagbo na usab sila niini’ng dapit nga giisip nila nga paraiso para kanilang duha. (Kataposan)