Pista sa bukid

Gula 29

Pagka hapon, gibati ni Kenn ang grabe’ng kahaw-ang. Ingon siya sa dili mahimutang tungod kay mibalik na man sa siyudad sila si Lyn kauban ang iyang mga barkada nga namista sa ilang lugar.

Takulahaw lang nga gidala si Kenn sa iyang mga lakang paingon sa payag sa iyang uyoan daplin niadtong kamaisan diin didto nila gidimdim ni Lyn ang dugam-is sa gugma nianang kaadlawon.

Misamot ang gibati nga kamingaw ni Kenn samtang iyang gihanduraw ang mga malipayong yugto sa ilang pagparayganay ni Lyn. Mihigda si Kenn sa bahin sa lantay’ng kawayan nga gihigdaan sa dalaga.

Nanglabay ang mga adlaw nga si Lyn ra ang diha sa huna-huna ni Kenn. Nakabantay gani niini ang iyang amahan nga mikomedya kaniya nga pakaslan na lang si Lyn.

“Ayaw kabalaka Kenn, kun makahukom ka nga magpakasal kamo niadto’ng dalaga nga taga siyudad, ibaligya nako ang duha ka dumaga nato nga baka aron gastoon sa inyong kasal,” matud sa amahan.

Usa ka gabii, giingnan na ni Kenn ang iyang mga ginikanan nga gusto na siya nga magminyo. Mapahiyumon mitangdo ang mga ginikanan ni Kenn.

Sa siyudad, wala usab mahimutang si Lyn. Gisungog siya sa iyang mga barkada kay kanunay lang usab nga maghinuktok. Wala mahanaw sa iyang kaisipan ang nahitabo kanila ni Kenn didto sa payag.

“Gugma na g’yud na day,” matud ni Nympha nga maguwang ni Kenn. Nakahukom si Lyn nga tug-anan si Nympha nga tungod sa love at first sight, gitugyan niya kang Kenn ang iyang pagkababaye. (Taposon sunod gula)