Miginhawa’g lawom ug mihilom si SPO1 Nicko Bernal. Iyang gipatuhop sa iyang salabotan ang tanang gisulti sa hepe. Misanong ang iyang kabubut-on nga duol sa tinuod ang gipanulti sa ilang labaw.
“Sa gikaingon ko na kanimo, Nicko, dili masayon-sayon kining pundok nga gusto nato nga banggaon ug lumpagon. Nagtuo ko nga daghan na sa ilang mga sakop dinhi sa atong lungsod apan wala lang kita makaila,” matud ni Chief Inspector Dindo Raval.
Sa nadungog ni Nicko, kalit may misantop sa iyang hunahuna nga buot niya nga isugilon ngadto sa hepe.
Gisuginlan ni Nicko si Chief Inspector Raval sa nahitabo sa ilang pagpatrolya didto sa Barangay Sun-ok kaganina. Iyang giasoy ngadto sa hepe ang nakita nila nga mga tawo nga nagsul-ob og tag-as nga mga sinena ug nagtabon sa nawong samtang nag-alirong sila sa dinagkotan nga mga kandila nga daw naghimo og usa ka ritwal.
“Posible nga mao na kadto ang mga sakop sa Bangkulis Black Brotherhood, Nicko,” nagkanayon ang hepe.
“Ako sila nga gisalbahan, sir, pero abtik kaayo nga midagan palayo sa dapit diin gihimo nila ang ritwal,” ni Nicko.
“Wala ba kamo makakita’g patay didto sa maong dapit?” sa hepe. (Sumpayan)