Naibog sa suki

Dear Tita Salie,

Tagoa lang ko sa ngalan nga Sofie, usa ka saleslady. Bahin sa akong nagustohan nga lalaki kining akong problema. Suki nako siya sa tindahan. Bisan gusto ko niya, apan ambot, mosurok g’yud ang akong dugo kun ako na siya nga makita. Diha nga akong nasayran nga may feelings pud siya diri nako, nahadlok ko kay menor de edad pa man gud ko ug siya 20 anyos na. But I really love him. Palihug pasabta ko, Tita Salie, sa maayo ko nga buhaton.

Hi Sofie,

Ingon nimo nakagusto ka sa maong lalaki nga imong suki sa tindahan. Apan ngano nga mosurok man ang imong dugo kun imo siya nga makita? Kini maoy ilhanan nga bata ka g’yud. Busa dili ka angay nga magdalidali bahin niini nga butanga, ilabi na may labot sa imong pagbati kay dili kini maayo ug posible nga moresulta kini og kapakyasan. Ayaw paghimo og lakang nga dili uban ang pagpamalandong. Giunsa nimo pagkahibalo nga you really love him?  Sofie, ayaw lantawa ang panagway o kahimtang. Hinuon, maoy agda ang pinitik sa imong kasingkasing. - Tita Salie