Gingharian sa mga okoy

Nakabig ang mga mata sa maghigala nga Berto ug Erning sa usa ka linaw nga may tawo nga naligo. Awaaw kaayo ang mao nga dapit.

“Bay? Wa ka ba mahadlok nga pagkamingaw diri nga dapita?” gisukna ni Erning ang tawo.

“Wa man ko mahadlok kay dugay na man ko nga magkaligoan diri pero ang akong amigo nga si Bruno nawala la’g kalit dinhi dugay na, mga bata pa kami niadto,” matud sa tawo.

Nagkasuod sila si Berto, Erning ug ang tawo nga si Cosak. Kanunay na sila nga maligo sa linaw. Nakahunahuna sila nga ilang sawmon ang linaw.

“Yuna pa! Di ba magkinahanglan ta og oxygen kay lawom man kaayo ang linaw? Gani kolor blue man ang tubig!” ni Erning. “Husto! Ang akong uyoan nga adunay amigo nga diver, hitsas kadto sa maong kahimanan, manghulam ta,” matud ni Berto.

Tuod, gisuhid nila ang kinahiladman sa linaw. Lainlain lang ang ilang nakita sa ilawom. Kalit lang may kahayag, ug sa ilang paglingi, usa ka dako’ng buaya ang ilang nakita. Ang mga mata niini maoy naghatag og kahayag sa baba sa langub.

Didto sa unahan, nakita nila ni Erning ug Berto si Cosak nga nagpangamay kanila. Miduol sila ug nanglurat ang ilang mga mata pagkakita sa estatuwa ni Lapu-Lapu nga naggunit og espada ug taming.

Nasulod dayon sa huna-huna ni Berto nga ang patay nga lawas ni Lapu-Lapu anaa sa dagat kay wa man g’yud kini igkita ang iyang lawas sa una nga panahon.

Unya, nakurat sila sa ilang nalantawan sa unahan. “Hala? Unsa man kining dapita bay Berto? Kadaghang tawo nga ikogan ug laksot ang mga nawong?” ni Cosak, nga pinahagawhaw ang tingog.

Kalit may nisampong sa baba ni Cosak ug dayong pasalipod sa dako’ng bato.

“Ayaw pagsaba, bay Cosak, ako ni si Bruno ang suod mo nga amigo!”

Nakurat si Cosak.“Dako kang, buhi bay?”

“Unya na ta mag-estorya ana bay, pagdali namo kay wala nay oras! Ania na dinhi padu’ng ang mga sundawo nga okoy?” ni Bruno nga mabalak-on.

Mitaghoy si Bruno ug dayon nitunga ang usa ka bakasi. Unya, kalit lang nausab ang bakasi ug nahimo nga higante’ng Endong.

“Endong ihatud kami sa pultahan paggawas ning linaw. Utang kabubut-on ko kini kanimo,” ni Bruno pa.

Mikabayo sila sa higante’ng Endong ug sa usa ka pamilok didto na sila sa baba sa langub nga nahimutang sa tiilan sa una nga Mactan Bridge. (Kataposan)