Misinggit kadtong tawo nga mibarog taliwala sa mga tawo nga nag-alirong sa daplin.
“Daygon ang hari sa kangitngit!” matud sa tawo. Unya, nadungog nila ni SPO1 Nicko Bernal ug kaubang mga polis nga mitubag ang mga tawo nga nag-alirong. “Daygon si Satanas!”
“Daygon ang hari sa kadautan,” misinggit na usab ang tawo nga nagbarog sa taliwala sa alirong.
“Daygon si Satanas,” mitubag na usab ang mga tawo.
Sa nadungog ni Nicko, nakasabot na sila sa kahulogan sa iyang nakita.
Misantop dayon sa iyang hunahuna nga ang maong mga tawo mga sakop sa Bangkulis Black Brotherhood. Dihadiha mikalit siya paggawas sa iyang gitagoan nga nagbitbit na sa iyang armas
‘Ayaw kamo pagpakita’g daotang lihok,” matud ni Nicko. ‘Mga polis kami.”
Ang mga sakop sa kulto nakalitan. Apan imbes motuman sa mando ni Nicko nga dili maglihok, nag-iyahay na hinuon og panagan ang maong mga tawo. Wala gayud sila mopatuo bisan gisalbahan sila ni Nicko.
“Gukdon nato, Sir,” ni Roy pa.
“Ayaw,” pugong ni Nicko. “Alkanse kita nila kay basin og may mga armas kadtong mga tawhana. Gawas pa, mas suheto sila niini’ng dapita kay kanato.” – Sumpayan