Bayad sa utang

Gubot ang katawhan sa barangay Mayana niining sayong  kabuntagon.  Gipatay si Joe Taruc alyas Bagsik. Gikahadlukan siya dinhi sa barangay Mayana ug sa kanait nga barangay. Sa iyang abilidad sa pangamot ug kaisog way makatuo nga mapatay sa ordinaryong tawo.

“Sapsing nga tawo lang ang  nakapatay ni Bagsik,”  ni Isko nga may dalang kantalita.

“Mao kanay giingon, ang tanan adunay katapusan,” hirit ni Islaw.

Daghang negatibong pulong madungog sa katawhan labi na sa pamilya nga nakatilaw sa kabangis ni Joe. Magkinto ang tawo nga masugatan niya. Labing menos bun-og sa kalawasan o pusil patay  maangkon sa tawo nga dili mauyonan ni Joe.

Apan lisud masulod si Bagsik sa bilanggoan. Matag salaod mabuhat niya, piyansahan sa inahan ug bayaran ang biktima. Maoy hinungdan sa dakong away sa ginikanan ni Joe.

“Gusto ko, Berta, nga makatilaw og prisuhan atong anak aron motagam. Sa imong gibuhat misiaw atong anak ug hapit na mahurot atong yuta sa pagpamaligya aron ibayad sa iyang kabuang,” yawyaw sa amahan usa ka higayon sa ilang away.

“Dili ka maluoy sa bugtong natong anak, Felix,  nga mapriso, ikaw kaha ang masulod sa prisuhan, lalim ba?” singhag sa asawa.

Way mahimo ang amahan nga mapanton si Joe. Ang inahan maoy modupa sa mga krimen nga mahimo ni Joe.

“Atong ikiha ang kriminal, Felix, sakit kaayo gibuhat niya sa atong anak,” sugyot sa iyang asawa.

“Mao nay akong pasidaan ni Joe, kaniadto, ayaw buhata sa uban ang dili mo gustong buhaton diha nimo,” pasabot sa bana. “Unya wala ka sakiti sa nahitabo?” sukna sa asawa.

“Kinsay dili sakitan nga nahurot ma’g baligya atong yuta? Ug ang nahitabo sa atong anak, bayad kana sa utang nga iyang nabuhat,” sa amahan. (Kataposan)