May gitago ang kangitngit

Gula 50

Wala nila gamita ang ilang mga flashlight aron dili sila mamatikdan sa mga tawo nga ilang gipanid-an.

“Andama kanunay ang inyong mga armas,” nagkanayon si Nicko. “Apan kutob sa mahimo, dili gayod kita magpabuto.”

“Oo, Sir,” hapit magdungan sa pagtubag ang tulo.

Mipaduol pa gayod sila sa nahimutangan sa mga tawo nga nanagyagubyob ug nanagdagkot og kandila. Wala madugay, ilang nasuta nga nag-alirong ang maong mga tawo sa daghang mga kandila nga gipangdagkotan. Nagsul-ob sila‘g tag-as nga mga sinina ug dili makita ang ilang mga nawong. Mura’g may gihimo silang ritwal.

“Kinsa man kana, Sir?” maguwang sa hagawhaw ang tingog ni Roy nga nangutana. “Dili ba kaha kana sila ang gipangita nato nga mga sakop sa kultong Bangkulis Black Brotherhood?”

“Mao kanay atong sutaon karon,” ni Nicko pa. “Panid-an lang una nato sila. Basta, pangandam lang gyud kamo kanunay.”

Nagpadayon sa pagpaniid sila si Nicko sa gibuhat sa mga tawo nga nag-alirong sa palibot sa dinagkotang mga kandila. Daghan sila.

Maglisod si Nicko sa pag-ihap sa ilang gidaghanon.

“Pagkilab sa pipila ka daklit, may usa ka tawo nga mibaro’g taliwala sa alirong. Gituy-od niya ang iyang mga kamot ngadto sa langit. -- Sumpayan pa