May gitago ang kangitngit - Gula 48
Nianang pagkagabii, nagpatrolya sila si Nicko sa lainlaing kabarangayan sa lungsod sa Tinago. Ilang nasuta nga alerto usab diay ang mga tanod sa kabarangayan. Nagbantay kini sa masig nila ka outpost.
Una nila nga gipatrolyahan ang Barangay Tugas. Gisunod nila ang Barangay Apitong ug ang Barangay Lawis. Dayon gilukop na nila ang 22 ka laing barangay sa Tinago.
Mingaw ang kinatibuk-ang lungsod. Wala’y timik ang kabalayan. Wala’y timailhan nga may mga tawo nga dautan nga naglublob sa kangitngit. Sila lang si Nicko ang nagtikawtikaw sa palibot.
“Mamalik na kita sa kuwerpo, Roy,” nagkanayon si Nicko pagsangko nila sa katapusang barangay nga ilang gipatrolyahan nga mao ang Barangay Sun-ok.
Dihadiha mi-backing si Roy nga maoy nagmaneho sa sakyanan. Gipabalik niini sa agi ang ilang gisakyan. Apan sa unahan og diyutay, sa may eskena paingon na ngadto sa sentro sa lungsod, kalit mibuto ang ligid sa ilang sakyanan. Giyatakan gilayon ni Roy ang preno.
“Demalas, mi-explode ang ligid,” nakatuaw si Roy. “Ilisan dayon nato,” nagkanayon si PO1 Rudy Alarcon nga naglingkod sa luyo nga lingkoranan sa sakyanan tupad ni PO1 Reuben Lebra. “May reserba man ta’ng dala.” (Sumpayan)
- Latest
