Nakurat kaayo si Lina sa kalit nga pag-abli sa pultahan dungan sa pagkahagsa sa usa ka tawo nga niwang. Nakahimungawong si Lina sa bayhon sa tawo. “Ikaw ba kini Poldo?” gipangutana ni Lina ang tawo.
Miyango ang tawo nga gihutoy pag-ayo sa ubo. “Hain man diay si... si Dong Leo nga atong anak? Mangayo unta ko’g pasaylo ninyo’ng duha. Gibasolan ko na ang tanan, day, pasayloa ko ninyo,” matud sa tawo.
Nanaog si Lina aron apason si Leo sa police station dili ra layo sa ilang balay. Samtang naglakaw, namalik sa panumdoman ni Lina ang pagbiya sa iyang bana kanila diha nga siyam pa ka tuig ang ilang anak.
Napulo ka tuig na sukad sa pagbiya ni Poldo kanila nga nakigtaban sa iyang kabit. Naninguha si Lina nga makanegosyo ug mapaeskwela niya si Leo.
Tungod sa pag-antos, napahuman ni Lina si Leo sa kurso nga Criminology ug nahimo kini nga polis.
“Ma, ngano nga nia ka man? May problema ba?” may kabalaka ang tingog ni Leo.
“Pauli usa sa balay Dong kay naghulat kanimo ang dugay na nimo nga gipangita. Pag-una na lang kay magpalit pa ko og tambal ug pagkaon para niya. Atong iselebrar ang iyang pag-abot kay birthday baya niya karon,” giingnan ni Lina ang anak.
Nakasabot si Leo kun kinsa ang gipasabot sa iyang inahan.
Apan pag-abot ni Lina sa balay dala ang tambal ug pagkaon, gisugat siya ni Leo nga luhaan ang mga mata.
“Ma, wala na si Papa, igo ra siya nga nakapangayo og pasaylo kanato’ng duha.” Nakahilak usab si Lina.
Sa haya ni Poldo, may miabot nga babaye’ng niwang nga may tulo ka bata. “Ako si Aida, ug sila ang tulo ka anak ni Poldo, mam, sir.”
Nagkatinan-away si Lina ug ang anak nga si Leo. “Mam, pagkahuman sa lubong ni Poldo mahimo ba nako nga ibilin dinhi ang akong mga anak, kay maglabada na lang ko,” pakiluoy ni Aida. Wa’y nahimo sila si Lina ug Leo gawas sa pagtangdo.
“Molakaw ko kay palitan nako og mga gamit si bunso ug duha nako ka manghod, apan mangadye usa kita, pahinungdan nato ang adlaw ni papa,” dason ni Leo.
“Daghan kaayong salamat sir, mam” nagdungan ang duha ka bata ug migakos sila ni Leo. “Unsay mam ug sir, sukad karon manoy na ang tawag ninyo nako.”
Si Lina ug Aida nagkinuptanay tungod sa kalipay samtang nangagas ang ilang mga luha.
Nangluhod sila og nangadye. “Daghang salamat, Pa. Ania kami nagkahiusa ug isaad ko kanimo nga dili ko pasagdan ang akong mga manghod. Happy birthday Pa.” (Katapusan)