May gitago ang kangitngit - Gula 44
Gimandoan sa hepe si SPO1 Nicko Bernal nga ilhon niya kun kinsa ang lider sa Bangkulis Black Brotherhood nga responsable sa pagpatay sa tulo na ka bata sa Tinago.
“Mao kana ang akong buhaton sir. Ilhon ko kun kinsa ang pangulo sa mga Bangkulisan,” matud ni Nicko, dayong biya sa opisina sa hepe.
Igo lang nga nakairag sa iyang swivel chair si Nicko, mitingog ang incoming call alert sa cellphone nga diha sa bulsa sa iyang karsones. Iya kini nga gikuot ug gitamdan ang screen.
Nahibulong si Nicko kay upat ka digit man lang ang mga numero nga 6666 ang mi-appear sa caller ID sa iyang cellphone.
May telepono ba gud nga mobile o landline nga upat ra’y numero? Nakapangutana siya sa hilom.
Gitubag ni Nicko ang tawag.
“Hello?” matud niya. Unya wala’y mitubag. Ingon sa namati lang ang nanawag sa iyang tingog.
“Kinsa ka man?” ni Nicko nga niining higayona mibati na og kapikal.
“Ngano nga dili ka man motingog? Pagpaila sa imong kaugalingon ug kun unsa ang imong tuyo?”
Apan wala gayud motingog ang nanawag. Nabati hinuon ni Nicko nga naputol na ang linya tali kanila. — Sumpayan
- Latest
