Gimandoan ni SPO1 Nicko Bernal si PO3 Roy Cañares nga pasudlon sa iyang opisina ang duha nila ka kaubang polis.
Wala madugay, misulod ang duha ka polis nga sila si Rudy ug Reuben. Gisugdan dayon ni Nicko ang pagsukit-sukit sa ginikanan sa gipatay’ng bata.
“Nakatimaan pa ba kamo sa nawong niadtong tulo ka tawo nga miadto sa inyong pinuy-anan ug nagpaila nga sila taga Statistics Office?” matud ni Nicko.
“Oo, sir,” ang bana maoy mitubag.
“Mahimo ba nga imong ihulagway kanamo ang ilang pamayhon ug panagway?” matud ni Nicko. “Mahimo kaayo, sir,” ang amahan sa bata gihapon maoy mitubag.
Giawhag ni Nicko ang duha ka polis nga mogama og cartographic sketch base sa ihulagway sa ginikanan sa bata. Mikuha dayon og lapis ug bond paper ang duha ka polis.
Tuod man, gihimo ang cartographic sketch sa tulo ka sakop sa Bangkulis Black Brotherhood nga maoy suspek sa pagpatay sa tulo ka bata sa lungsod sa Tinago.
Gideboho nila ni Rudy ug Reuben ang panagway sa mga suspek base sa giasoy sa magtiayon ngadto kanila. Dugay-dugay gayud nga natapos ang paghimo niini. – Sumpayan