May gitago ang kangitngit

Gula 32

Nahinangop kaayo si SPO1 Nicko Bernal nga iyang gikahimamat  ang tulo niya ka kaubang polis gawas sa ilang police station.

“Manglakaw ta, moadto kita sa Barangay Lawis,” matud ni Nicko.

“Mag-unsa man ta didto, sir?” nangutana si PO1 Alarcon. Gitug-anan ni Nicko ang tulo ka polis nga gusto niya nga pakigkitaan ang mga ginikanan niadtong ikatulo nga bata nga gipatay.

Wala na mangutikuti pa ang tulo. Misunod na lang sila kang Nicko nga mipaingon na sa nahimutangan sa ilang patrol car.

“Ikaw la’y drayeb, Roy,” ni Nicko.

Misanong si Roy. Diha nga nakapahimutang na sila’ng tanan sa sakyanan, mipahugong si Roy sa pagpadagan.

Kadali ra sila nga nahiabot sa Barangay Lawis. Midiretso sila sa pinuy-anan sa mga ginikanan sa ikatulo nga bata nga gipatay sa mga Bangkulisan. Gipakigsultihan niya ang nagmagul-anon nga mga ginikanan.

“May lead na ko kun kinsa ang responsable sa pagpatay sa inyong anak ug ingon man sa lain pa nga duha ka bata nga gipatay sa lainlaing barangay dinhi sa Tinago,” nagkanayon si Nicko.

Nakugang ang magtiayon sa gisulti ni Nicko. Lakip sila si PO3 Roy Canares, PO1 Rudy Alarcon ug PO1 Reuben Libra nakalitan usab sa iyang gipadayag.

Wala man gud sila sultihi ni Nicko kalabot sa Bangkulisan Black Brotherhood. (Sumpayan)

Show comments