Ang turo nga kabaw ni Islaw

Samtang naglingkod sa nag-igdal nga gamot sa daku’ng punoan sa bangkal daplin sa sapa, mapahiyumon nga gitutokan ni Islaw ang iyang turo nga kabaw nga mikisap na sa tunaan.

Unya, gilantaw ni Islaw ang duha ka ektarya niya’ng uma nga bag-o lang gayud niya nahuman pagdaro ni’ng udtoha ug diritso niya’ng gitudlingan aron andam na nga pugsan og binhing mais inig-abot sa uwan.

Sa ilang baryo sa Kabadyangan, si Islaw na lang ang bugtong nanag-iya og kabaw, kay halos tanang mga mag-uuma sa ilang baryo, gipamaligya naman ang ilang mga kabaw.

Ang mga mag-uuma sa Kabadyangan nagsalig na lang sa duha ka traktora sa barangay kapitan nga maoy ilang abangan alang sa paspas ug dinalian nga pagdaro sa mga patag nga umahan.

Daghan sa mga silingang mag-uuma ni Islaw ang nagkahiusa sa pagsugyot kaniya.  “Bay Islaw, ayaw na pag-antos og gamit sa puthaw mo nga daro, uy! Ibaligya na kanang kabaw nimo! Pangabang na lang sa traktora ni Kapitan...!”

“Hay, kanimo Islaw! Antos ka man niana’ng daro. Naay paspas nga modaro nga traktora...!” “Makasapi pa ka, Law, kun ibaligya nimo ang imong turo nga kabaw...!”

Si Miley, ang asawa ni Islaw nga nagsabak na sa una nila’ng liwat, misugyot na lang ‘sab sa pagbaligya sa ilang turo nga kabaw.

“Bitaw, Law! Ang halin sa atong turo nga kabaw atong tipigan sa banko! Pangabang na lang sa traktora aron makapahulay ‘sab ka’g daro sa atong uma...!” Apan wala mahaylo si Islaw. Gipalabi niya ang paggamit sa puthaw niya’ng daro nga guruyon sa turo niya’ng kabaw nga gisab-ongan og yugo ang liog.

Mihulma na ‘sab ang talagsaong pahiyom ni Islaw nga mitindog gikan sa gilingkuran niya’ng igdal nga gamot sa daku’ng punoan sa bangkal ug milantaw sa patag nga kaumahan sa iyang mga silingan ug sa tanang lumolupyo nga mag-uuma sa ilang baryo nga nalibon ug wa’ pa g’yud matikad.

Nagdungan og kaguba ang duha ka traktora sa barangay kapitan nga palitanan pa og mga pisa. Milanat na’g usa ka bulan nga wala na magamit ang duha ka traktora kay nagpaabot pa sa gi-order nga mga pisa. “Daku g’yud og kapuslanan ang akong turo nga kabaw ug ang puthaw ko nga daro...!” hilom nga nakatuaw si Islaw sa tumang kalipay.

Inig-abot sa ting-ulan, sila ra si Melay, sa tanang mag-uuma sa baryo ang makapugas sa natikad ug natudlingan na niya nga duha ka ektarya’ng patag nga darohan. (Kataposan)