Nagdali si SPO1 Nicko Bernal pagsulod sa ilang lawak ni Gelli ug gikuha ang iyang armas. Pagbalik niya sa sala, namatikdan siya sa iyang asawa.
“Ngano’ng gikuha mo man kana’ng imong armas?”
“Ayaw’g saba. Ayaw lang kamo paglihok diha,” maguwang lang sa hagawhaw ang tingog ni Nicko.
Wala na mangutikuti si Gelli. Gituman na lang niini ang gisulti ni Nicko. Gigunitan ni Gelli ang ilang anak nga si Barbie.
Si Nicko mipahipi sa kilid sa bintana ug milili sa gawas. Maoy girumbo sa iyang panan-aw ang dapit sa koral diin nakita niya ang anino kaganina.
Nagmingaw na ang maong dapit karon, timaan nga wala na’y tawo nga nagtago didto.
Apan gisiguro g’yud ni Nicko. Gianinaw niya’g maayo ang palibot. Tingali’g mibalhin lang og gipasalipdan ang tawo.
Sa dan-ag sa suga sa poste, iyang naklaro nga wala na gayu’y tawo nga nagpaniid sa palibot.
Gilugakan ni Nicko paggunit ang iyang armas. Mibiya siya sa may bintana ug miduol sa inahan ug anak.
“Nga-ngano man diay?” sukit ni Gelli.
“Wa' na’y kuydawo. May nakita man gud ko nga anino sa tawo nga naghupo-hupo luyo sa koral ug mura’g kita ang gipanid-an,” tug-an ni Nicko. (Sumpayan)