Bilyako nga polis

Gula 3

Nagpaila ngadto ni Elmer ang babaye nga anak sa bata-bata sa drug lord sa Duljo-Fatima nga ilang nadakpan ug nasakmitan og daghang shabu.

Nagpaila ang babaye nga si Fatima. “Bahala na og inyong kasohan ang akong amahan basta makapiyansa lang siya ug makagawas sa prisohan. Mobayad mi nimo,” giingnan ni Fatima si Elmer.

Mipahiyom si Elmer ug abtik nga miandar ang utok. Aduna siya’y gihuna-huna. “Buyno, suwayan nato og hangyo ang among  opisyal. Apan puwede ba nga gawas sa ihatag nimo nga kuwarta, mag-deyt ‘sab ta?”

Wala makatingog ang babaye nga anak sa dinakpang drug pusher sa gikondisyon ni Elmer, mura’g naghuna-huna. Dayon mipasiklap kini kang Elmer.

Nagpahiyom si Elmer nga nagsud-ong ni Fatima. Gitapin-an ni Elmer ang bukton ni Fatima ug hinay-hinay kini nga gihuhapohap. “Sige na Fat, sugot na lang nga mag-deyt ta kay motabang ko aron dili kaayo bug-at ang kaso sa imong papa,” ni Elmer.

“Kuwarta na lang gud ang ihatag namo nimo, daku nga kantidad. Akong ingnon si Mama nga pahatagan ka’g P200 mil, ayaw na lang na ang deyt,” matud ni Fatima.

Igo lang mipahiyom si Elmer. “Sige ha? Tabangan mi nimo sa kaso ni Papa?” si Fatima na ‘sab ang migunit sa bukton ni Elmer. May pahiyom na nga mibathay sa panagway ni Fatima.

“Kadto ra g’yud ang akong gikondisyon nimo. Gawas sa kuwarta, mag-deyt ta,” dayong biya ni Elmer ug misulod balik sa ilang opisina. (Sumpayan)