Gula 21
“Nakakaplag kami’g daghang kandila sa palibot sa patay’ng lawas sa bata ug mga upos na ang maong mga kandila sir,” matud ni PO3 Roy Cañares. “Hain man ang maong mga upos sa kandila,” nangutana si SPO1 Nicko Bernal kang Roy.
“Amo na nga gihipos sir, kay basin diay kun makatabang kadto sa atong imbestigasyon,” matud ni Roy. Naghinuktok si Nicko.
“Mura’g may nagpaluyo’ng misteryo sa kamatayon niining bataa sir,” giingnan ni Roy si Nicko nga mikalit pagkunot ang agtang. “Ngano man?”
“Tungod niadtong mga kandila nga among nakaplagan. Mura ba’g may gihimo sila nga ritwal sa wala pa nila patya ang bata,” pasabot ni Roy.
“U-unsa?” tuaw ni Nicko.
“Mao kana, sir. Ug gawas sa mga upos sa kandila, may lain pa g’yud kami nga nakuha sa crime scene.”
“Unsa man?” ni Nicko nga naikag pag-ayo sa giasoy ni Roy.
“Kini, Sir,” si PO1 Alarcon ang mitubag dungan sa pagtunol ngadto kang Nicko sa usa ka basahon nga itom ang hapin. “U-unsa ni?” ni Nicko nga midawat sa libro nga gitunol ni Alarcon kaniya.
Si Roy ang miasoy. “Nakaplagan kana namo dapit sa ulohan sa bata, sir. Pero wala kami makasabot sa sulod niana’ng libroha.” (Sumpayan)