Gusto na nga moundang

Dear Tita Salie,

I’m Mr. Weak. Diretso na lang ko sa akong problema bahin sa akong kaugalingon nga naglibog unsa’y maayo’ng buhaton. Usa ko sa mga biktima sa ilegal nga drugas ug gusto na unta’ng moundang niini’ng bisyoha apan usahay maglibog ko kay gusto na kaayo ko moundang apan dili nako makaya. Mahunong man tuod pero pila ra ka adlaw ug inighuman balik na ‘sab. Tita Salie, gusto ko maminaw sa imong tambag basin makatabang.

Maayong adlaw Mr. Weak,

Ayaw kaguol ug kalibog. Duna’y mga problema nga labaw pa sa imoha. Ug kun sila nakalingkawas ikaw usab makahimo niini. Nia ang pipila ka sugyot: 1.) Kun maghunahuna ka nga mobiya na sa drugas iampo kini sa Diyos nga tabangan ka nga makalingkawas. Balikbalika paghangyo ang Diyos. Hangyoa siya nga hatagan ka niya og direksyon sa kinabuhi. 2.) Paningkamoti nga masunod g’yud ang mga lagda Bibliya base sa (Timoteo 2:22) nga nag-ingon: “Kagiw gikan sa mga tinguha nga iya sa pagkabatan-on, apan tinguhaa ang pagkamatarong, pagtuo, gugma, pakigdait, uban niadto’ng nagatawag sa Ginoo gikan sa usa ka hinlo nga kasingkasing.”

3.) Tagsa-tagsaha pagbuntog ang maong bisyo ug kahuyangan. Likayi usab ang pagpakig-uban sa mga tawo’ng makainpluwensiya nimo. Ang (Corinto 15:33) nag-ingon. “Ayaw pagpahisalaag. Ang dautang pagpakig-uban makadaot sa mapuslanong pamatasan.” -- Tita Salie