Adto ta sa paraiso

Adto ta sa paraiso, Bay...! ni Marjun nga mitutok kang Boy ning udtoha,  sulod sa giabangan nilang balay sa eskuwater nga maoy gihimo nilang hideout, sa matag panghold-ap ug panulis nila sa mga taksi, dyip pasaheroan ug van-wagon sa mga ahenteng magdiliber og lainlaing mga produkto.

Nahimong mga notadong hold-aper ug tulisan sila si Marjun ug Boy nga idlas pas manatad sa mga tinugyanan sa balaod. Pulos na sila mga wanted dead or alive sa kapulisan, dili lamang sa siyudad ug lalawigan sa Sugbo, kay may gipamusil-patay na sila sa mga taksi drayber nga magdugaydugay paghatag sa ilang kinitaan, ahente sa delivery van ug pasahero sa dyip pasaheron nga mohana sa pagsukol. Human makatulis og delivery van sa ahente og sigarilyo, ania karon sila nga nagbahinay sa ilang gitulis.

“Unsa guy adto ta sa paraiso, Bay Mar! Pasimuaw man ka!” miiknat ang kilay ni Boy nga mitutok kang Marjun.  “Kitang mga wanted ug dakpunon nga mga tulisan, wa nay lugar sa paraiso, bay Mar...!”

“Nakahukom man gud ko, bay Boy, nga magbag-o na’s kinabuhi! Gusto na kong mosurender sa mga tinugyanan sa balaud, ilabi na kay Biyernes Santo karon. Maghinulsol ta’s tanan natong mga sala! Mangayo ta’g pasaylo sa atong Ginoo aron makabaton ta’g luna didto sa paraiso...!”

Unya, nahipugwat silang Marjun ug Boy, dihang milanog ang singgit didto sa gawas.

“Marjun Mantos! Boy Yban! Mga pulis kini! Sa ngalan sa balaud, ampo na lang mo, aron way daotan nga mahitabo kaninyo ning adlaw sa Biyernes Santo...!”

“Karamba! bay Marjun, mga pulis! Dali, manibat ta agi sa kusina!” ni Boy nga miibot dayon sa gisuksok nga rebolber sa iyang hawak ug nagdaling migula sa kusina. Misunod usab si Marjun. Apan gibilin niya ang iyang rebolber sa sulod sa balay. Dili siya mosukol sa mga pulis!

“Bang! Bang! Bang...! Bang! Bang! Bang...!”

Nagpakapaka ang mga armas-de-fuego gikan sa kapulisan. Mitulilik si Boy nga naigo sa bala ug natumba sa dalan. Wa nay panahon sa pag-surender si Marjun. Naigo siya sa tiyan! Miping-it sa kasakit.   Nahiabot si Marjun sa sulod sa simbahan. Nagkaguliyang ang mga tawo sa pagkakita niya nga naligo sa dugo. Nahagba siya sa tiilan sa dakong  krus sa sulod sa simbahan. Sa danag niyang kahimatngon, hilom siyang nakatuaw sa dakong rebulto ni Ginoong Hesus nga nagdupa sa Krus.

“Ginoo, pasayloa ko’s akong mga sala! Iuban ko nimo sa paraiso....!”

Mihagtos ang gininhawa ni Marjun sa pag-abot sa mga pulis sa sulod sa simbahan. Wala na niya maaninaw ang panagway sa dakong rebulto ni Ginoong Hesus nga nagdupa, nga daw nagpahiyom kaniya. (Kataposan)