Dear Tita Salie,
Ako si Audrey, from Lapu-Lapu City, 18 ug 3rd year college student. Duna ko’y crush sa school nga usa ka teacher. Duna siya’y number nako. Na-shock g’yud ko kay one time nagteksanay mi, then kadugayan sa among conversation niingon bitaw siya nga “can I ask you a date?
Pero wala man ko nisugot kay may makakita unya namo, Tita Salie. Bawal ba maibog sa atong maestro?
* * *
Hi Audrey,
Nag-atubang ka karon sa sitwasyon nga ang imong prayoridad angay’ng tagdon. Ang panahon nga mobati og crush normal kini nga masinati sa lalaki man o babaye. Apan sa imong pagkabutang, Audrey, maayo’ng ipukos usa nimo ang atensiyon sa pagtuon.
Hinumdomi nga milaom ang imong mga ginikanan nga ikaw mulampos sa pag-eskuyla. Usa ka butang ang angay nimo kini nga hatagan og katumanan. Unsa may intensiyon sa imong teacher sa pagdapit kanimo og date?
Nasayod man unta siya nga ikaw usa ka estudyante? Palandonga pag-ayo kini’ng maong pangutana. Ang wala nimo pagsugot sa iyang hangyo maoy timaan nga dili ka pa andam.
Isip maayo nga magtutudlo maoy iyang prayoridad ang pagtudlo sa iyang estudyante sa leksiyon ug mga maayo’ng sulondon sa iyang isigkamagtutudlo. Itingob usa ang imong pagtagad sa pagtungha. - Tita Salie