Dili kita biyaan sa Diyos

Naglagiting ang kainit sa Biyernes Santo. Ang dinagaang sa kainit sa udtong tutok daw makapaso nga motapdas sa kalawasan sa tawo. Apan wala panumbalinga nila ni Billy ug Pipo ang makasunog nga kaudtohon.

Padayong nagdusoduso sa ilang hiniusang karomata ang amahan ug anak nga nagsuot-suot sa kadalananan sa nagkalainlaing barangay sa siyudad. Padayon ang pagpamasin nilang pagpamasura aron makakita sa mapuslan ug mahalin pang mga basura sa kadalanan nga ikatumod sa suki nilang  junk shop sa siyudad.

“Paita ning kinabuhi nato, pa, uy! Nag-antos ta’s tumang kawad-on!” tuaw ni Pipo nga mitutok sa iyang amahan.

“Sagdi lang anak, maluoy ra gihapon nato ang Diyos, nga bisan sa way puas tang pagpamasura matag adlaw, makalahutay ta’s atong pagpuyo sa eskuwater!” ni Billy nga mipikpik sa abaga sa 8-anyos nga anak nga nagtulok sa karomata.

“Patay ron ang Diyos, pa! Samot na nga biyaan ta niya ning adlawa! Kay gikan pa sa sinugdan, mura man og gibiyaan na ta’s Diyos...?”

Paghitungod sa usa ka dakong punoan sa sambag, nanghunong sila si Billy ug Pipo sa pagtulod sa karomata.

“Dili kita biyaan sa Diyos, dong Pipo! Basta mosangpit lang kita kanunay niya ug mosunod sa iyang kabubut-on, anaa ra gayud siya sa atong kiliran!”

“Ngano man lagi nga misinggit man si Ginoong Hesus, pa, sa pag-ingon: “Diyos ko, Diyos ko, nganong gibiyaan mo ako!” nagkatawa si Pipo. “Gibiyaan man gani siya sa Diyos, samot na ta nga kabos kaayo, pa!”

Nakapahiyom si Billy nga mihapuhap sa ulo sa anak. Nasayod siya nga dili pa kaayo makatugkad ang 8-anyos niyang anak sa Katapusang Pito ka Mga Pulong ni Hesukristo sa Krus. Apan nakadayeg siya sa iyang anak sa pagkakutihan niini.

Unya, sa atbang nga dakong balay, gitawag sila si Billy ug Pipo sa tag-iya niini. May liundok nga mga hinanip sa daang atop sa buslutong sin nga gihatag kanila sa tag-iya sa dakong balay sa ilang pagduol. Ila dayon kining gikarga, nga nakapuno sa karomata.

“Tan-awa dong Pipo! Sakto ang giingon ko nga dili kita biyaan sa Diyos...!” ni Billy nga mikihat sa anak. Ug malipayon nga giduso sa amahan ug anak ang ilang karomata paingon sa suki nilang junk shop, niadtong udtoha sa Biyernes Santo. (Kataposan)