Graduwasyon sa Santa Filomena College. Kwaresma ang panahon apan way init nga misalida karong hapona. Naglugitom ang langit nga may timailhan sa dautang panahon. Maoy gikabalak-an ni Gea nga may bagyong moabot.
Apan nalipay si Gea nga mitambong ang iyang agawon sa ilang graduwasyon nga gihimo sulod sa simbahan sa Santa Filomena. Milumpayat ang iyang dughan sa kamaya ug nahinumdom sa kagahapon.
“Sir Fredo, mopauli lang ko sa amo aron maundang na ang inyong away ni Mam Lina,” hangyo ni Gea sa iyang amo.
“Ayaw kana buhata, day Gea, buotan ka nga bata. Unya na layas dinhi sa among panimalay, kun makatapos ka sa imong pag-eskuwela,” ni Fredo.
Ang kaayo sa agawon nga lalake ni Gea maoy nakapugong sa iyang paglayas. Gipakuha siya sa kursong Edukasyon.
Bisan wa siya’y suweldo nga madawat isip katabang sa panimalay apan dako’g alawans ang ihatag ni sir Fredo niya alang sa iyang pagtuon.
“Gitawag na ang imong ngalan day Gea, adto na ta!” sangpit ni sir Fredo niya nga nakapukaw sa nagduhiraw nga hunahuna ni Gea.
Mapailubon si Gea nga mipaso kauban sa iyang amo nga misab-ong sa medalya nga iyang nakuha isip Magna Cum Laude sa kursong Edukasyon.
“Congrats day Gea!” Gigakos siya sa iyang agawon ug gihagkan.
“Sir Fredo, Mam Lina, salamat kaayo sa inyong pagpatungha nako, ug siguro panahon na nga mobiya ko sa inyong pinuy-anan,” ni Gea.
“Ayaw kana buhata day Gea. Nabasa nako ang sulat gikan sa imong inahan sa dihang nag-ilaid pa siya sa sakit nga kanser nga akong nakit-an sa aparador ni Fredo kagabii. Ug akong nasayran nga anak ka ni Papa Fredo nimo,” ni Lina.
Gakos maoy nabuhat ni Gea sa iyang amahan ug nagpasalamat siya sa sulat sa iyang inahan nga nakit-an. Ug nakita ni Gea sa gawas nga hayag na ang kalangitan. (Kataposan)