Dear Tita Salie,
Hello! Good morning. Like nako basahon ang imong mga tambag nga binase sa Bibliya. Anyway, usa ko ka inahan nga dili hilig mamunal sa akong mga anak. Unya karon daghan moingon nako nga kinahanglan daw kuno pod bunalan panagsa labina kun makasala.
Sus, Tita Salie pagkakaron grabe na kagahi’g ulo ang mga kabataan dili hinuon tanan apan kasagaran. Angay ba gyod bunalan nato ang atong mga anak kun makasala? Palihog pasabta ko. Salamat kaayo.
* * *
Good morning. Sukad pa sa sinugdanan ang mga ginikanan gitahasan og usa ka obligasyon ngadto sa ilang mga anak. Tudloan, matutuon. Ug sumala sa Proverbio 22:6 nagaingon: “Bansaya ang bata subay sa dalan nga alang kaniya; bisan kun siya matigulang na dili siya motipas gikan niana.” Tinuod nga gikinahanglan usab ang bunal uban ang pagbadlong kay ang Proverbio 13:24 nagaingon: “Ang nagapugong sa iyang bunal nagadumot sa iyang anak, apan ang nahigugma kaniya nagapangita kaniya uban ang disiplina.”
Ug ang Proverbio 29:15 midugang “Ang bunal ug ang pagbadlong nagahatag og kaalam; apan ang usa ka bata nga pinasagdan maghatag og kaulawan sa iyang inahan.” Hinumdomi una pagbadlong, sunod bunal alang sa disiplina.-- Tita Salie