Siya ug ako sa kangitngit

Gula 26

Nasayod na ko sa tuyo ni agaw Paulo kun ngano’ng paadtuon ko niya sa hotel nga iyang giistaran. Gusto na sab siya’ng mopahimulos sa akong lawas.

“Dili ko moadto,” giingnan ko siya. “Ayaw pagpagahi-gahi sa imong ulo, Monica,” may kagahi ang tingog ni agaw Paulo.

“Tingalig magbasol ka sa kaulahian. Nasayod ka na kun unsay mahitabo sa imong mga ginikanan kun dili ko nimo tumanan. Tingali’g nagtuo ka nga nagkomedya lang ko o kutob lang ko sa panghulga. Makahimo ko pagpatay sa imong mga ginikanan. Bisan ang imong inahan nga igsuong pursoso sa akong Nanay maoy akong unahon pagtipi.”

“Mananap ka g’yung dako! Demonyo!” nagpangagot ang akong bag-ang nga nagtan-aw ni Paulo.

“Nganli ko bisa’g unsa kay dili ko kana igsapayan. Ang importante alang nako mao nga motuman ka sa akong gusto. Basta...magpaabot ko nimo unyang gabii. Kinahanglan nga sa dili pa mo alas diyes tua ka na sa hotel.”

Gitug-an ni Paulo nako ang ngalan sa hotel nga iyang giistaran ug kun hain kini mahimutang aron dili ko maglisod pagtultol.

Wala ko’y laing nahimo gawas sa pagtuman sa gusto ni Paulo. Unsaon nga wala man ko’y kapilian maong napugos ko pagsunod sa gusto niya’ng mahitabo. – Sumpayan