Misawom si Jeffrey ug hinay kini nga mitunga didto sa likud nga bahin sa nahimutangan sa mga barkada ni Janeth. Sila si Janeth ug ang mga barkada niini didto nagtutok sa dapit nga diin mitidlom sa tubig si Jeffrey.
Hinay nga mibalik pagsawom si Jeffrey ug mipaingon siya sa grupo nga pareho’ng nagbarug sa tubig nga taga dughan ang giladmon.
Gikomedyahan niya’g gunit ang tiil ni Janeth. Nakaila siya nga kang Janeth kadto nga tiil tungod sa gisul-ob niini nga bathing suit.
Puwerte’ng nakaiktin-iktin ni Janeth nga nakuratan pag-ayo apan wala kini makapugong sa iyang pahiyom pagkakita ni Jeffrey nga mitungha sa iyang atubangan. Nangatawa ang mga classmate ni Janeth nga midayeg kaayo kang Jeffrey.
“Sori kaayo ha, wala g’yud ko makaandam. Nag-brief lang gani ko kay gipugos man g’yud ko’ng Janeth nga maligo. “Wala’y problema bai Jeff, aron may kauban ka nga mag-brief, inigkawas nato, hukason ko kini’ng akong short pants aron duha na ta nga mag-brief lang,” matud ni Lito.
“Ako ‘sab, mag-brief na lang ‘sab ko,” matud ni Cardo nga boyfriend sa laing classmate ni Janeth.
Taud-taud, mikawas sila aron mangaon. Alegre kaayo sila ug gitabangan nila ang litson nga gi-donate niya sa pagpangaligo sa mga barkada ni Janeth.
“Salamat kaayo Jeff ha? Kun wala ka pa mo-donate og litson, inasal nga manok ra g’yud unta ang among madala,” ni Janeth pa nga midalit og tam-is kaayo’ng pahiyom.
Human nila’g pangaon, mibalik sila sa dagat. Apan niini’ng higayona, nagpares-pares na ang maghigug-maay. Nagpares usab sila si Jeffrey ug Janeth. (Sumpayan)