Kusgan si Anatiya mangtas

Bag-o pang namatay ang bana ni Anatiya nga si Presko ug namatikdan ni Leon, silingan nilang Anatiya nga ulitawong guwang nga kanunay kining muadto sa may tubod ug dili lang kaduha sa usa ka adlaw kun dili hasta katulo o kaupat ka higayon.

Usa ka adlaw gipanid-an ni Leon si Anatiya nganong magsige’g adto sa tubod nga nahimutang sa karaang dakit nga dunay yungib sa ubos. Dinhi nadiskobrehan ni Leon nga maligo diay ang biyuda.

Mura’g giinitan kini sa iyang lawas kay mosawom man kini sa may lim-aw sa ubos-ubos nga bahin sa tinubdan. Kaanindot ra ba’g lawas sa biyuda, ni Leon pa sa hilom. Hinuon, dili kini maghubo kun maligo, humdon lang niini ang iyang sinina. Usa ka oras mokawas na kini sa lim-aw ug dayon sudlan ang iyang balde og tubig, dayong pauli biniking ang iyang balde nga puno sa tubig. Nahibulong si Leon sa iyang nakita kay mura lang og nagbitbit si Anatiya og usa ka gaang butang nga unta bug-at man ang balde nga puno sa tubig alang sa usa ka babaye. Way butang-butang ang pagbiking ni Anatiya hangtod na sa pag-abot sa ilang balay.

“Kusgana nimo, uy, Tiyang,” ni Leon pa ngadto sa biyuda dihang nakalugar siya’g anha sa balay niini aron mangayo’g tangad.

“Nganong nakaingon ka man, Leon, nga kusgan ko,” ni Anatiya o Tiyang.

“Nakita tika nga wala nimo ibutang ang gibiking mong balde nga puno sa tubig hangtod na sa inyo,” ni Leon pa nga mura’g tahado mopahayag. “Mao ba, aw, natural gyud tingali ni nako nga kusgan,” ni Anatiya. “Hoy, kuan diay nganong wala ka pa man magminyo. Guwangguwang ka na man, ‘ulitawong guwang’ he, he, he,he.”

“Wala pa man gud koy gihigugmang babaye, Tiyang,” ni Leon sa seryoso nga tingog. “Pero, karon, may nakita na ko nga angay nakong higugmaon.”

“Kinsa man nang bayhana, taga ato na,” nagpakisayod si Anatiya.

‘Oo, ug kanang bayhana mao ikaw, Tiyang,” hinay ang pagpamulong ni Leon.

“Ha, ako gyud, nga biyuda man ko. Kadaghang dalaga dinhi sa ato. Mangita man ka’g dili na birhen,” dihay kilab sa mga mata ni Tiyang nga mikalit og tutok kang Leon. “Dili importante nako ang birhen nga babaye, Tiyang. Ang importante nga buotan kini ug unya maayong momahal ug mopangga nako bugti sa ako sang pagmahal niya,” mitutok si Leon kang Tiyang.

Usa ka gabii, may upat ka tawo nga misaka sa balay nilang Tiyang ug buot molugos sa biyuda. Gikuptan si Anatiya sa tulo ka lalaki nga nagmaskara ug unya gihinayhinay paghubo ang sinina niini. Dihang wala nay sapot si Tiyang sugdan na unta pag-angkon ang lawas sa biyuda sa masabot nga maoy “gang leader” apan kalit lang gipang-itsa sa bintana ang mga manglulugos nga lalaki ug unya gisuyopan sila sa ilang dugo. Kining tanan nakita ni Leon sa duha niya ka  mata ug gibati siya’g kahadlok. (Kataposan)