Dear Tita Salie,
Maayong adlaw. Usa ko sa mga nagsunod sa imong lindog. Ako diay si Aizo. Ang problema nako bahin kini sa akong gikarelasyon. Mag unom na kami ka tuig. Ang problema nako niini’ng akong girlfriend kay magselos man ko, sakitan man ko kun makit-an nako siya nga may laing kuyog. Diha’y time nga nag-date sila sa iyang friend nga boy nga bag-o pa niya nakaila, unya sa iyang mga friends pa g’yud nako nahibaw-an. Unsay angay ko’ng buhaton, Tita Salie? Palihug pasabta ko. Salamat.
* * *
Maayo’ng adlaw Aizo,
Hatagi og panahon ang open nga pakigsultihanay sa imong karelasyon karon. Dili kini lisud para nimo kay six years na man kaha mo nga lahutay sa inyo’ng relasyon. Tungod kay ang maayo nga pagkahan-ay sa panahon, mohatag kana og positibo nga dagan kaninyo’ng duha. Kay ang matag butang adunay tinudlo’ng panahon.
Sumala sa Ecclesiastes 3:1,2 “Adunay tinudlo’ng panahon alang sa tanang butang, bisan usa ka panahon alang sa matag kalihokan ilalom sa langit. Panahon sa pagkatawo ug panahon sa pagkamatay; panahon sa pagtanom ug panahon sa pag-ibot sa gitanom.” Sulbara ninyo’ng duha ang butang nga dili nimo gusto ug ang dili niya gusto pinaagi sa inyo’ng duha ka panahon. – Tita Salie