Siya ug ako sa kangitngit - Gula 16
Miduol ko sa nahimutangan sa kama ug mihigda. Giumod ko ang akong nawong sa unlan ug mihilak ko’g maayo. Gipahungaw ko ang tanang kahuot sa akong dughan.
Pagkahapon, nahiabot sila si Tatay Arcenio ug Nanay Teresita gikan sa dakbayan sa Tagbilaran. Igo lang ko’ng misugat nila aron makatabang og dala sa ilang mga kinompra.
Mibalik dayon ko’g sulod sa akong kuwarto. Apan nag-amping ko nga dili sila makamatikod nga adunay dautang nahitabo kanako samtang didto sila sa Tagbilaran.
Sa among pagpanihapon, gipaningkamotan ko’ng dili mamatikdan sa akong mga ginikanan nga nagmasulob-on ko. Dili ko gusto’ng makamatikod sila nga duna ko’y problema.
Segurado’ng kuti-kutihon ko nila. Dili ko buot nga mahitabo kini kay tingali’g dili ko makapugong pagbutyag sa matuod nga nahitabo nako.
Dili ko gusto’ng malambigit sa eskandalo ang among pamilya.
Pagkaugma, Domingo sa buntag, sayo ko’ng mibangon ug naligo. Human makapamahaw, mibiya ko sa among gipuy-an aron mosimba.
Nagpahatod ko’g habalhabal paingon sa simbahan. Namasin ko nga lamdagan sa Balaang Espiritu ang akong hunahuna ug giyahan sa angay ko’ng buhaton aron makakat-on ko pagdawat sa trahedya’ng midangat sa akong kinabuhi. (Sumpayan)
- Latest
