Sa kanhiay’ng panahon may usa ka gingharian nga gimandoan ni Haring Anas. Aduna siya’y anak nga si Prinsesa Maria. Wala magmalipayon ang prinsesa kay wala siya’y kagawasan. Mao nga naa ra siya sa sulod sa palasyo.
Sa dihang hingkod na ang iyang panuigon, nangahas siya sa pag-atubang sa iyang amahang hari.
“Amahan kong hari, hingkod na ang akong panuigon, gusto kong makagawasgawas sa palasyo”.
“Mahal kong anak nga prinsesa, tugotan ko ikaw sa imong gihangyo apan ubos sa kondisyon, nga kun abusahan mo gani ang imong kagawasan, silotan ko gayod ikaw.”
Gipahimuslan dayon sa prinsesa ang iyang kagawasan. Gilibot dayon niya ang tibuok gingharian. Gibati sa prinsesa ang tumang kalipay. Apan usa ka higayon niana samtang naligo siya uban sa iyang mga dama sa sapa, nalinga siya sa paglangoylangoy ug napunta siya sa sulog nga dapit ug siya gianod. Sa nakita sa mga dama ang kahimtang sa prinsesa, naninggit sila og panabang. Miabot si Juan ang magbalantay sa karnero ug giluwas ang prinsesa.
“Salamat Juan sa imong pagluwas kanako. Dili ko gayud kalimtan kini sa akong tibuok kinabuhi. Utang naku kanimo ang akong kaluwasan.”
“Dako nakong dungog ug kalipay ang pagluwas sa among mahal ug matahom nga prinsesa.”
Human masayri sa hari ang nahitabo, grabeng sukoa sa hari. Gisilotan ang prinsesa ug dili na siya makagawas sa palasyo. Nasubo ang prinsesa ug igo na lamang siya sa paghilak.
Nanglabay ang mga adlaw ug nagkasakit ang prinsesa. Wala siya’y ganang mokaon ug dili makatulog. Nabalaka pag-ayo ang hari. Busa iyang gipatawag ang mga batid nga mananambal sa gingharian. Usa sa mga mananambal mitagna sa sakit sa prinsesa.
“Mahal nga hari ang prinsesa nasakit sa kasingkasing.”
“Unsa may hinungdan nga nasakit sia sa kasingkasing?”
“Tungod sa gugmang wa ka hungaw.”
Gisukitsukit dayon sa hari ang prinsesa.
“Kinsa man ang lalaki nga imong gihigugma, usa ba ka prinsipe sa silingang gingharian?”
“Dili amahan kong hari, siya si Juan.”
Wala’y nahimo ang hari, gipatawag dayon niya si Juan aron makasal sa prinsesa. Human sa kasal gipaila dayon si Juan nga maoy bag-ong prinsipe sa gingharian. (Katapusan)