Tim-os nga pagbati

Gula 14

Nagdungan og pangaon sila si Loreto, Evelyn ug ang tiguwang kusinera nga si Dading.

“Gitug-anan mo na ba si Nang Dading nga ikaw ang nanghawod sa inyong klase Lyn?” gipangutana ni Loreto ang dalaga nga maoy nagbuak sa ilang kahilom. Igo lang nga mipahiyom si Evelyn ug milingo-lingo.

“Mao ba day? Ikaw diay ang nanghawod sa inyong klase? Mga pahalipay nimo day. Kun wala ka pa paeskuwelaha ni Dong Loreto tingali naminyo ka na day kay guwapa ka man,” matud sa tiguwang kusinera.

Mingisi si Evelyn. Misagbat si Loreto sa gisulti sa kusinera. “Karon Nang Dading, kun makagradwar na siya, puwede na ba siya nga magminyo?” gisukna ni Loreto ang edaran nga kusinera.

“Puwede na g’yud sir nga magminyo si Inday Evelyn kay nakahuman na man og eskuwela. Ikaw ‘sab unya Dong Retz, pagminyo na unya kay kapin ka na sa 40 ug nagpabilin pa nga ulitawo,” gikomedyahan sa kusinera si Loreto.

Nakapahiyom si Loreto. “Pareson ba kami’ng duha si Evelyn nga magpares Nang Dading. Ayaw lang tan-aw ang gap sa among pangedaron,” gipangutana ni Loreto ang kusinera.

Wala dayon kini makatubag. Gitan-aw si Loreto kun nagkomedya ba lang ug dayon gitakli ang iyang panan-aw sa dalaga.

“Sa gugma Dong Retz wala may bata ug tiguwang. Kun magkasabot gani ang duha ka binuhat, baliwala na ang pangedaron. Ang mahinungdanon mao nga tinuoray sila nga nagminahalay,” ni Nang Dading.

Nagtinutokay sila si Loreto ug Evelyn. Nakapahiyom ang kusinera nga nagtan-aw kanila kay nakasabot kini nga nakagusto na g’yud og babaye si Loreto nga sa dugay’ng katuigan nagpakahilom lang ug nagpabiling ulitawo. (Taposon ugma)