Bakunawa

Ning gabhiona, nasaksihan ni Romy ang kasaba ug kaalingisig sa mga butang nga gihapakhapak, gipingkipingki ug gipatingog sa mga molupyo sa ilang baryo. Mga lata, plato, sugong, agong, budyong ug tambol ang misibaw sa tibuok kalikopan.

Ang lapyong kaisipan ni Romy sa edad nga 7, naikag sa pagpangutana sa iyang papa Ponso, samtang linga nga nanghugas sa gikan-an nilang mga plato sa kusina ang iyang mama Tina.

“Pa, nganong langas man kaayo sa mga tambol sa gawas ning gabhiona...?”

“May bakunawa, Dong Rom! Gitukob sa bakunawa ang bulan....!”

“B-bakunawa....? Unsa man nang bakunawa, Pa...?”

“Mangtas nga mananap ang bakunawa, Dong Rom! Mura’g dragon, matud pa sa katigulangan....!” gihapuhap ang ulo ni Romy sa iyang papa Ponso. “Sa pagkakaron, di pa ka kasabot bahin sa bakunawa, Dong Rom...!”

“Hala! Bakunawa...! Gitukob ang bulan? Mao diay nga ngitngit kaayo rong gabhiona, Pa...!”

“Oo, Dong Rom! Kay hapit na man malamoy sa bakunawa ang buwan!”

“Hadlok diay ang bakunawa sa mga lanog sa tambol, Pa...?”

“Oo, Dong Rom! Pinaagi sa kalangas, kaalingisig sa tunog sa tambol, sugong, agong ug budyong, ikulipa sa bakunawa ang buwan...!”

“Hala! Di diay mi makaduwa ron og tago-tago uban nilang Galy, Pete, Rael, Michelle ug Rose, tungod kay gitukob sa bakunawa ang buwan!”

“Dili una mo ron magdula didto sa bakante, Dong Rom! Wa pa iluwa sa bakunawa ang gitukob niyang buwan....!”

Nakapanglingo ang lapyong kaisipan ni Romy. Sa gawas padayon nga nadungog niya ang linagubo sa tambol ug ang bulhot nga tingog sa mga sugong, agong ug budyong. Milanog usab ang singgit sa mga tawo.

“Buhii ang buwan, bakunawa....!”

“Ang buwan gitukob sa bakunawa....!”

Igo lang nga nakapahiyom si Ponso nga naghunahuna sa iyang anak nga iyang gipatuo bahin sa bakunawa. Nakapanglingo usab siya nga naghunahuna sa mga molupyo sa baryo, nga mituo gihapon sa kinaraan nga pagtuo sa bakunawa, kun dunay mahitabong eklipse sa buwan ug adlaw. (Kataposan)