Gula 8
Wala na’y pugong-pugong ang pagparayganay nila ni Aldrin ug Jenny. Ingon sa gipahimudsan nila ang kangiob nga pawong pa ang kuryente. Dili g’yud sila makita si Jenny ug Aldrin sa ilawom sa nagyung-yong nga dahon sa bombil.
Gipatagamtam ni Aldrin ang katam-is sa iyang mga hawok ngadto kang Jenny. Anam-anam usab nga gianod si Jenny sa sulog sa iyang pagbati tungod sa wala’y hunong nga pagpabatyag og kahinam ni Aldrin ngadto kaniya.
Wala na’y umoy si Jenny aron santaon si Aldrin nga nagsugod na sa pagpanghiram sa lainlaing bahin sa iyang kalawasan. Tungod sa gihimo ni Aldrin kang Jenny, misamot ang gibati nga kahinam sa dalaga ug hugot na kini nga migakos kang Aldrin.
Ang gakos ni Jenny ngadto kang Aldrin maoy nagsugnib og dugang pa nga kahinam mao nga giukoban pag-usab sa ulitawo ang mga ngabil sa dalaga.
Pareho sila si Aldrin ug Jenny nga nagpugong sa ilang mga tingog aron dili makamugna og kasaba ug dili sila mahibaw-an nga anaa sila nagpahipi sa ilawom sa mga nagyung-yong nga sanga sa bombil. Mipaspas na ang ginhawa ni Aldrin ug Jenny ug hapit na gayud sila maanod sa ilang mga pagbati.
Taud-taud, may nadungog sila nga adunay babaye ug lalaki nga nagsultihanay ug nagpaingon kini sa ilang nahimutangan. Unya, milingkod ang paresan diha gayud sa tiilan nga bahin nila ni Aldrin ug Jenny.
Mihunong sila si Jenny ug Aldrin sa ilang pagparayganay apan pabilin sila nga naggaksanay. Naniid sila sa sunod nga panghitabo. Nagpinarayganay ang paresan sa maghigugmaay nga diha sa ilang tiilan, apan dili nila kini makita.
Wala’y nahimo si Aldrin, mainampingon niya nga gihagkan si Jenny ug sa makausa pa giukoban ang mga ngabil apan nagmatngon nga dili makamugna og kasikas. (Sumpayan)