Dear Tita Salie,
Hi! Tagoa lang ko sa ngalan nga Apollo, taga Negros ko. Sukad sa una pa nga ganahan g’yud kaayo ko nga mag-inusara. Karon 13-years old na ko. Ingon ang akong mga higala killjoy kuno ko. Ambot ba, Tita Salie, nga bisan mag-inusara ko okey ra man nako. Mao g’yuy akong hilig nga mag-inusara. Duna’y muingon nga mura’g duna kuno ko’y kaugalingong kalibutan.
Tinuod ba ang ilang gisulti? Nga dili daw maayo ang kanunay mag-inusara? Unsaon nga dili man g’yud ko ganahan makig-bonding sa akong mga kaila. Palihug pasabta ko.
Hello Apollo,
Dunay panultihon nga nag-ingon: “Ang kagahapon ug karon dako gayud og kalainan.” Tinuod gayud kini nga panultihon. Kay sa una sa kanhi bata ka pa, ang imong isip bata ug maoy hilig nimo nga mag-inusara. Apan karon kay 13 years old ka na, matawag nga teenager ka na. Busa angay usbon ang imong pagkatawo ngadto sa pagka-teenager.
Apollo, nagpasabot dinhi nga kun bata ka pa ganahan ka nga mag-inusara ug karon nga batan-on ka na mas ikalipay nimo kun duna kay mga higala. Ayaw kanunaya ang pag-inusara. Pakigsuod, pakighigala una sa imong pamilya, dayon ngadto sa imong mga higala. Kay diha sa suod nga panaghigalaay makaplagan nimo ang tinuod nga kalipay. - Tita Salie