Jezebel

Gula 188

Pero kun may daotan ma’ng laraw si Edward alang nako, mahibaw-an ko ra kana kun mokuyog na ko niya. Andamon ko na lang ang akong kaugalingon sa bisan unsa man nga posible’ng mahitabo.

Wala pa g’yud mapapas sa akong hunahuna ang katahap nga tingali’g manimalos si Edward kanako kay gipatay man sa akong amahan ang iyang papa human masakpi nga mikabit sa akong inahan.

Hinuon, wala makighisgot si Edward kanako bahin sa nahitabo sa among mga ginikanan. Nakasabot ko nga pulos lang bahin namo’ng duha ang gusto niya’ng among hisgotan. Mao nga for the mean time, gidawat usa nako ang iyang tanyag. Ingon man g’yud niini ang kinabuhi sa tawo. Mapugos man g’yud ta’g kapyot sa tumoy sa kutsilyo kun hapit na malumos.

Mamahala na lang ko. Ang importante nga duna ko’y kadangpan dinhi sa siyudad human sa akong paglayas gikan sa balay sa akong agalon. Basin diay kun tininuod ang pagtabang ni Edward nako.

“Pero dili kaha ta maikog sa imong iyaan?” gipangutana ko si Edward. “Akoy bahala, Jezebel. Ayaw na’g hasola ang imong hunahuna mahitungod niana.”

Human mi makakaon, nanggawas kami sa fastfood outlet. Mipara dayon si Edward og taxi. Nanakay mi og nagpahatod sa Inayawan. (Sumpayan)