Gula 186
“Naglatagaw ko karon nga wala’y tumong, Edward. Wa pa gani ko’y pamahaw kay sayo kaayo ko’ng mibiya sa akong gigikanan.”
Pagkadungog ni Edward sa akong gisulti, wala siya mag-usik og panahon. Giagda ko niya nga mangaon una mi. Wala ko mobalibad kay tinuod man nga gigutom na ko’g maayo.
Nanabok kami sa pikas bahin sa karsada diin nahimutang ang usa ka fastfood outlet ug misulod. Si Edward ang nangunay pag-order sa among pagkaon. Nangaon dayon mi pag-abot sa among gi-order.
“Karon sultihi ko, Jezebel,” ni Edward pa samtang nangaon mi. “Ngano’ng nakaingon ka man nga nahimo’ng miserable ang imong kinabuhi?”
Gitug-anan nako si Edward nga milayas ko sa akong amo.
“Wala na ko masayod kun unsa’y angay ko’ng buhaton, Edward,” nako pa. “Wala koy kadangpan dinhi sa siyudad.”
“Ayaw kabalaka,” nagkanayon si Edward. “Karon nga nagkakita na g’yud kita, dad-on ko ikaw ngadto sa akong gipuy-an sa Inayawan.”
“U-unsa?” Nakalitan ko. “Karon nga nakita ko na ikaw, Jezebel, dili ko mosugot ug makatugot nga mawala ka pa pag-usab sa akong kinabuhi.”
Wala ko motingog. (Sumpayan)