Miginhawa’g lawom si Roland, unya gibuhian ang hataas nga pagpangagho. Ingon sa gituhop siya og kaluoy kang Kenneth samtang nagbakho kini og nangayo’g pasaylo kaniya. “Didto ka lang usa sa gawas sa opisina John kay may panagsultihan usa kami ug kini’ng maong babaye,” giingnan ni Roland ang higala’ng polis.
“Karon dayon, adtuon nato ang imong gipuy-an aron sutaon kun wala ka ba mamakak. Kun mahibaw-an gani nako nga gibakakan mo lang ako, dili ako maluoy nga mopapriso kanimo,” matud ni Roland.
Giubanan nila ni Roland ug John si Kenneth didto sa iyang gipuy-an. Nasuta ni Roland nga tinuod ang tanang gisulti ni Kenneth. Nakita ni Roland ang niwang kaayo nga anak ni Kenneth ug ang kapaet sa iyang kahimtang sa pinobre kaayo niya’ng panimalay uban sa iyang inahan.
Mihilom si Roland nga naghuna-huna sa sunod niya’ng pagabuhaton. Nanaog ang kaubang polis ni Roland ug gibiyaan sila si Kenneth nga nagsultihanay sa gamay’ng kaayo nga hawanan sa ilang panimalay.
“Abi nimo Kenneth, sa pipila lang ka adlaw nga kita nagkauban niadtong Sinulog diin gitugyan mo kanako ang imong kaugalingon didto sa hotel, miturok dayon sa akong kasing-kasing ang usa ka pagbati,” matud ni Roland.
Giingnan ni Roland si Kenneth nga bisan pa sa iyang nahimo, iyang patrabahuon ang dalaga sa gidumala niya nga kompaniya. “Ipasalig ko nimo sir nga magbinuotan g’yud ko sa akong pagtrabaho ug dili g’yud magpakauwaw kanimo,” ni Kenneth nga miluhod sa atubangan ni Roland.
“Ayaw pagluhod. Lauman nako nga tumanon nimo ang imong gisaad nga magbinuotan na sa imong pagkatawo,” matud ni Roland nga mihapuhap sa abaga ni Kenneth nga wala makapugong sa pagbakho. (Katapusan)