Gula 183
Dili na g’yud nako maihap pa kun makapila na ko mapahimusli ni Red. Kaadlawon na’ng mibiya si Red sa akong lawak. Mao kadto ang routine sa akong kinabuhi samtang mibakasyon si Manang Ester sa Mindanao. Matag gabii mosulod si Red sa akong kuwarto ug kaadlawon na’ng mogawas.
Magtagbaw siya’g maayo pagpahimulos kanako. Hangtud nga usa ka hapon niana, mipauli si Mrs. Elvira Lim sa balay gikan sa ilang opisina nga dili na kauban si Red.
Nahibulong ko kay kaganina sa iyang paggikan, kauban man niya si Red. Apan ngano’ng karon dili niya kauban si Red sa pagpauli. Nasayran ko na lang gikan mismo ni Mrs. Lim nga mipauli diay si Red ngadto sa Negros. Emergency kuno.
Sumala sa gisugilon sa akong agalon, nakadawat kuno og text message si Red gikan sa usa sa iyang mga igsuon didto sa Negros nga nagpahibalo kaniya nga giatake sa kasingkasing ang ilang amahan ug namatay.
Mao nga kalit kaayo ang pagpauli ni Red ngadto sa Negros.
Gikalipay ko sa hilom ang pagpauli ni Red ngadto sa Negros. Nahunahuna nako nga makapahulay ko’g pipila ka adlaw sa iyang pagpangabuso. (Sumpayan)