Naglibog

Dear Tita Salie,

Tagoa lang ko sa ngalan nga Ash, lima ka tuig na nga minyo ug may usa ka anak uban sa akong bana. Karon ko lang nasayran nga aduna na diay siya’y anak kaniadto sa wala pa kami ug sige pa ang ilang relasyon ug sa inahan sa bata.

Sakit g’yud kaayo, Tita Salie ang iyang gibuhat. Wala tuyoa nagkakita mi sa akong uyab kaniadto ug nagkabalik mi karon. Naglibog na ko karon kay mas love na nako ang akong ex-BF. Palihug pasabta ko unsay maayo ko’ng buhaton.

 * * *

Maayo’ng adlaw Ash,

Gusto sa Diyos nga ang kaminyoon balaan, hinungdan nga naghatag siya og mga paagi paggiya aron mahuptan ang malipayong kaminyoon.

Apan dili mahibaw-an nga dunay mga kasakit nga usahay mohapak luyo sa kalipay sa kaminyoon.

Kinahanglang batonan g’yud ang pagtahod kay motabang kini sa mga kapikas sa kaminyoon nga dawaton ang mga kalainan sa panglantaw ug mga gusto sa usag-usa.

Ikaduha, kumunikasyon kay mahinungdanon kini sa kaminyoon. Ang imong suliran tinuod sakit kini para nimo nga duna diay lain ang imong bana ug matud nimo nagkabalik pud mo sa una nimo’ng uyab. Dili ba sakit pud kini alang sa imong bana?

Mao nga kini nagkinahanglan og kumunikasyon. Ang bana mopasundayag og gugma sa asawa pinaagi sa pagpakig-estorya sa asawa ug pagtahod kaniya. Mao usab ang buhaton sa asawa. -Tita Salie