Human makahurot og duha ka botelya nga light beer si Kenneth, iyang giingnan si Roland nga dili na siya moinom. Nakabantay si Kenneth nga gibati na siya og pagpanglipong.
Wala pugsa ni Roland si Kenneth sa pag-inom og dugang. “Dunay diskohan diha sa atbang ning atong giimnan, manayaw ta?” matud ni Roland. Mitangdo dayon si Kenneth. “Sige aron mawala ni’ng akong pagpanglipong,” ni Kenneth.
Gibayran ni Roland ang ilang giorder. Nanglakaw sila ug nanabok sa karsada. Tuod, daghan na kaayo’ng mga tawo ang didto sa sulod sa diskohan. Human mibayad sa entrance fee, miorder og duha ka botelya sa beer si Roland.
“Duha na lang ka botelya ang atong orderon Kenn. Dili ‘sab maayo nga manayaw lang ta nga wala’y mainom,” matud ni Roland. Gipangitaan sila og kalingkoran sa waiter nga miabi-abi kanila.
Usa na lang ka nagtupad nga lingkoranan ang nahabilin. Nagtupad na lang sila si Kenneth ug Roland sa paglingkod. Gi-serve dayon kanila ang duha ka botelya’ng beer.
“Tagsaan na lang nato ni Kenn, hinay-hinayon lang nato pag-inom,” matud ni Roland nga mitungab dayon sa botelya sa beer. Misunod usab si Kenneth sa pagtungab.
Nanayaw dayon sila diha ra sa atubangan sa ilang lamesa dungan sa tugtog. Mga kinaraan nga tukar ang gipatugtog mao nga naikag g’yud sila sa pagsayaw.
Nasabot ni Roland nga maya kaayo si Kenneth sa ilang panag-uban. (Sumpayan)