Alas 9:30 na sa gabii. Nakaseguro ko’ng nagpaabot na kanako si Red didto sa iyang katulganan sa may garahe. Bisan wala ko mosanong sa iyang gisulti apan nasayod ko’ng dili siya magpabalibad.
Naghayang ko’ng naghigda sulod sa akong kuwarto nga ingon sa wala mahimutang. Nahasol ang akong hunahuna. Moadto ba ko sa katulganan ni Red sa garahe o dili?
Mao kini ang pangutana nga wala ko pa kahatagi’g tubag. Naglisud ko pagdesisyon. Kun ang ako lang pagbuot maoy matuman, dili g’yud ko moadto sa kuwarto ni Red.
Apan kun dili ko siya tumanan sa iyang gusto, tingali’g tinud-on na niya ang iyang bahad nga tug-anan niya si Mrs. Elvira Lim bahin sa relasyon namo ni James.
Sa kahadlok nga tinud-on ni Red ang iyang bahad, nakahukom ko’ng tumanan siya sa iyang gusto. Miadto ko sa nahimutangan sa iyang kuwarto.
Paghitungod nako sa pultahan sa iyang kuwarto, nanuktok ko. Giablihan dayon ni Red ang pultahan. “Sulod dayon,” matud ni Red.
Misulod ko sa iyang kuwarto. Gipalong ni Red ang suga sulod sa iyang lawak ug gigunitan niya ang akong bukton. (Sumpayan)