Gugma sa bitin

Gula 1

Kalma lang nga naglakaw si Roland paingon sa Cebu City Sports Center. Dunay siya’y duha ka tiket sa grand stand nga bantang kaayo sa stage nga sayawan sa mga Sinulog contingents.

Gituyo ni Roland ang pagpalit og duha ka red tickets kay giimbitar niya si Lalaine ang amiga nga mitug-an kaniya nga gusto kini nga motan-aw sa pasundayag sa mga Sinulog dancers anha gayud sa stage.

Apan buntag sayo kaniadto’ng Domingo giteksan si Roland ni Lalaine nga dili siya mahinayon pagkuyog kay miabot ang iyang boyfriend nga nagpuyo sa Bohol.

Ingon sa kalit lang naluya si Roland kay gusto g’yud unta niya nga sila si Lalaine ang magkauban sa pagpanan-aw sa Sinulog Grand Parade kay niana’ng adlawa iya na kini’ng pangulitawhan.

Nag-inusara si Roland nga naglakaw-lakaw sa Imus Road ug subay sa carousel route. Gusto niya nga inighuman niya’g suroy sa carousel route, unya na siya mosulod sa grandstand.

Mga alas tres na sa hapon nga may  nasigpatan si Roland nga gipundokan sa mga tawo diha sa aseras. Nahibulong kaayo si Roland kun unsay gikagubtan nga ang mga tawo wala na man motan-aw sa parada.

Misuway siya paglili ug nakita niya ang dako kaayo’ng bitin nga kolor yellow. Daghan diay kaayo ang nagpakuha og hulagway sa mao nga bitin samtang ila kini’ng pas-anon.

Nalingaw na lang ‘sab si Roland. Takulahaw lang nga ang ulo sa bitin mituyhakaw paingon sa iyang gitindogan. Misinggit pagkalit ang usa ka babaye nga diha sa iyang tupad ug naigo si Roland sa kamot niini sa paninguha sa babaye nga mawakli ang bitin.

“Sorry, sorry kaayo ha? Wala nako tuyoa,” giingnan sa babaye si Roland. (Sumpayan)