Salamat sa pabuto

“Wala g’yud ko makasabot kun ngano’ng mikuyog ko nimo niini’ng lugara Ruben,” matud ni Zeny diha’ng didto na sila sulod sa kuwarto sa Q6.

Mipahiyom si Ruben. “Nagtimaan kana nga gibugtian nimo ang akong pagmahal ug paghigugma kanimo Zen.”  Naginaksanay sila’ng duha ug takulahaw lang nga nag-ukobay ang masi’g nila ka mga ngabil.

“I love you Ruben,” wala makapugong si Zeny sa pagpadayag sa iyang gibati ngadto sa iyang seaman nga boyfriend. Mikalit lang og kamingaw ang tibuok lawak.

Gitagay nila ni Ruben ug Zeny ang dugos sa pagminahalay. Tam-is kaayo nila nga gisaw-an ang dugos sa gugma. Gisubli-subli nila ang ilang gihimo nga puno sa pagminahalay.

Kapin sa upat ka oras nga gisaw-an nila ni Zeny ug Ruben ang makabuhong nga kalipay sulod sa kuwarto sa Q6 motel. Hapit na mokilum-kilom nga nanggawas sila sa Q6. “Gusto unta ko nga wala nay katapusan ang atong panag-uban Ruben,” matud ni Zeny. “Ayaw kabalaka Zen, human sa sunod nako nga pagkanaog sa barko, magpakasal na kita.” Gigakus pag-ayo ni Zeny si Ruben tungod sa kalipay. Gikan sa Q6, nanuroy sila sa SM City Mall. Pagkaugma, miuli na si Ruben sa ilang dapit sa Dumaguete apan wala’y putol ang ilang komunikasyon.

Unya, miabot na usab ang adlaw nga mosakay na pagbalik si Ruben sa barko. Nagkita usa sila si Zeny sa dakbayan sa Sugbo ug sa makausa pa gisubli nila ang pagtagay sa kalipay sa usa ka motel sa V. Rama Avenue. Paspas ang pagpanglabay sa panahon, milabay ang duha ka tuig ug nahibalik na si Ruben gikan sa pagtrabaho niya sa barko. Gituman gayud ni Ruben nga pakaslan niya si Zeny. Sangko sa langit ang kalipay ni Zeny ug Ruben. Nagkataw-anay sila nga naghandom nga ang ilang panagkaila tungod lang sa pabuto. (Kataposan)