Dear Tita Salie,
Maayong adlaw kaninyong tanan dinhi sa Banat News, esp. kanimo. Tawga lang ko sa pangalan nga Magdalena. Magpatambag lang ko kabahin sa gisulti sa akong boyfriend. Iya man gud ko giingnan nga untidy daw kong tan-awon. Duna man gyuy tawo nga hugawon tan-awon, Tita Salie, di ba? Gisakitan baya ko sa gisulti sa akong boyfriend. Unsa may akong buhaton? Maayo kaha nga sultihan ko siya nga nahiubos kos iyang gisulti? Palihug pasabta ko. Thank you so much.
* * *
Hello! Magdalena, kun baliktaron nato ang sitwasyon, kun pananglit ang imong boyfriend maoy untidy, imo ba usab iyang sultihan? Siyempre oo dili ba! Kay kini alang ra man usab sa iyang kaayohan. Karon kun gisultihan ba sa imong boyfriend angay pa unta magpasalamat ka, kay nakita niya ang imong kahuyangan ug gusto ka niya nga bag-ohon.
Kun ang usa ka butang nga hugawon tan-awon kondili gayud usbon ug hinloan magpabilin gayod kanang hugawon tan-awon. Apan lahi ang tawo kay ang tawo dunay kasingkasing nga makamao nga mobati kun unsay angay ug dili angay. Ug ang tawo makamao mismo nga magbag-o sa iyang pagkatawo.
Magdalena, dili na kinahanglan nga imo pa siyang sultihan nga nahiubos ka, basin unya’g madugangan lang ang imong kahiubos ug mosangpot pa sa dakong problema. -- Tita Salie