Salamat sa pabuto

Gula 16

Miparayeg na pag-ayo si Zeny kang Ruben samtang nagkaduol na ang ilang gisakyan sa dakbayan sa Sugbo.“Itugyan nako nimo ang akong kaugmaon Ruben.

Lauman nako nga dili na ako mahisukamod pag-usab sa ikaduha nga higayon pagsulod ko sa gugma,” matud ni Zeny.

“Akong isaad Zen, tibuok kasing-kasing ko ikaw nga panggaon ug mahalon,” dali’ng tubag ni Ruben dungan sa pagpabatyag og hugot nga gakus sa iyang girlfriend.

Tugob sa kahinam ang gibati ni Ruben. Wala gayud siya magdahom nga mosangpot sa ingon niini nga  sitwasyon ang ilang panagkita ni Zeny. Sa sinugdanan, gusto ra g’yud unta nga motabang si Ruben kang Zeny diha nga ang iyang anak nabuthan sa rebentador nga gipabuto sa pag-umangkon ni Ruben.

Pag-abot nila sa south bus terminal, nanganaog sila si Zeny ug Ruben sa ilang gisakyan. “Asa ta manuroy?” gisukna ni Zeny ang iyang boyfriend.

“Mo-check-in usa ta sa hotel. Mopahuway usa ta kay udto pa, igo g’yud nga inigkahapon, manuroy na sa mga mall kay duna ko’y paliton para nimo Zen,” giingnan ni Ruben si Zeny.

Tuod, mipara si Ruben og taxi. Misakay sila sa likud nga lingkoranan.  “Ihatod mi sa Q6 bai,” gimandaran ni Ruben ang taxi driver. “Maayo didto sa Q6 kay duol ra sa SM City.

Wala danti’g dugay, misulod na ang gisakyan nila nga taxi sa Q6. Miliraw ang mga mata ni Zeny nga nasayod na kun unsay sunod nga mga panghitabo tali kanila ni Ruben.

Nanulod dayon sila sa kuwarto sa motel. (Sumpayan)