Salamat sa pabuto - Gula 1

Wala mahimutang si Zeny diha nga gipahibalo siya sa iyang ig-agaw nga ang bugtong niya’ng anak nga nagpangedaron pa og kuwatro-anyos nabuthan sa rebentador ug nabulit sa dugo. Aksidente nga nabuthan og rebentador ang bata diha nga midagan paingon sa pundok sa mga batan-on nga nagpabuto sa dakbayan sa Toledo.

Naghilak si Zeny nga mikugos sa iyang anak nga puwerte usab nga nakahilak samtang nagkadugo ang bukton nga maoy nabuthan sa rebentador nga gitawag og super lolo. Gitabangan si Zeny sa iyang kahigalaan aron mahatud sa tambalanan sa dakbayan sa Sugbo ang bata. Wala nila iagi sa ospital sa Toledo ang bata kay nabalaka sila sa kahimtang niini.

Usa ka tuig na ang milabay apan ang mao nga hitabo makuli nga makalimtan ni Zeny tungod kay kini maoy nahimong taytayan sa panagkaila nila ug ni Ruben. Dalaga pa si Zeny apan inahan na siya sa bugtong anak nila ug sa kanhi niya hinigugma.

Giatiman tuod dayon sa mga doktor sa Vicente Sotto Memorial Medical Center ang anak ni Zeny. Ingon siya sa nahuwas-huwasan og gamay diha nga giingnan siya sa doktor nga dili lang mabalaka kay luwas ang kahimtang sa iyang anak.

Nalitok ni Zeny ang pulong pagpasalamat ni Senyor Santo Niño tungod kay nagtuo g’yud siya nga nagrabehan ang iyang anak. Taud-taud, dunay tawo nga misulod sa emergency room ug nangita sa bata nga nabuthan og rebentador nga gikan sa Toledo.

Napalingi si Zeny. Gitudloan sa mga nurse ang tawo ngadto sa katre nga nahimutangan sa anak ni Zeny. “Uncle ko niadto’ng bata nga miitsa og rebentador sa karsada unya wala usab tuyoa nga midagan ang imong anak,” matud sa lalaki.

Gipasaligan si Zeny sa lalaki nga siya ang moabaga sa mga gastohan alang sa pagpatambal sa bata. (Sumpayan)