Dear Tita Salie,
Tagoa lang ko sa ngalan nga Mayumi, usa ka dalaga og dunay boyfriend nga maoy naghatag og kahasol sa akong kinabuhi karon.
Nakamatikod man gud ko nga mura og nausab na man ang iyang tinagdan diri nako. Dali ra kaayo siyang masuko, panagsa na lang mo-text ug motawag nga sa una permi man unta niya kining buhaton.
Dili na usab mopatuo nako kun akong badlungon kay magsige man og inom bisan kun duna siya’y sakit. Mao ba kini ang ilhanan nga duna na siyay lain, tita Salie? Gusto na unta nakong putlon ang among relasyon apan ingon sa dili nako makaya kay love man kaayo nako kining akong hinigugma.
Unsa man ang angayan nakong buhaton? Palihog pasabta ko, tita Salie. Thank you.
* * *
Mayumi,
Ako hugot nga nagtuo nga kun unsa ang imong batasan karon kana tungod kay ingon ka niana nga gipadako sa imong pamilya.
Mao gani nga ang bata luoran, spoiled tungod kay gipaundayonan kini sa ilang mga ginikanan. Tungod sa dakong gugma sa ginikanan ngadto sa iyang anak mamahimong spoiled ang bata. Apan kun loving ug sweet gani ang mga tawo nga kuyog sa pagdako sa bata dako gyud kaayo ang posibilidad nga magtubo ang bata nga mahigugmaon.
Ingon niana ang batasan nga gipakita sa imong uyab diha kanimo tungod ra usab kanimo. Iyang nakita diha kanimo nga dako kaayo ka og gugma kaniya. Nga bisan unsay iyang buhaton anaa ra gihapon ka tungod kay love kaayo nimo siya.
Kinahanglan nga strong ka sa imong pagkatawo ug sa imong pagpakigrelasyon aron tuohan ug respetohon sa imong karelasyon. Kun gusto ka’g kausaban, ayaw pasagdi nga magpadayon ang dili nimo gusto. Kay matud pa sa giingon “sometimes the most loving answer is no.” -- Tita Salie