Pinaskuhang gipangayo ni Cesar buta

Hilabihang agik-ik ni Carlito dihang gisuginlan siya sa iyang asawa sa gipangayong pinaskuhan  ni Cesar buta. Daghang butang nga magamit  sa inadlaw niyang lakaw pero “Flashlight” gyud  ang gipangayong pinaskuhan. Mao nga dili makatuo si Carlito sa gipangayo ni Cesar buta.

“Mobalik siya rong hapon, kauban  ni Joseph. Kuhaon niya ang iyang gipangayo,” taho ni Sonia nga asawa ni Carlito.

“Way problema, aduna kitay flashlight nga akong gitaguan,” tubag ni Carlito.

Suod nga higala ni Carlito si Cesar. Sa pagkatawo ni Cesar daan na siyang buta. Silingan sila sa barangay Mayana, ang bukirang barangay sakop sa lungsod sa Asturias. Pulos bukid ang imong makita.

Lugot maoy imong maagian usa ka moabot sa imong padulngan. Layo sa buhilaman ang barangay Mayana. Gani way elektrisidad ang maong barangay.

Si Cesar maoy maayong gitarista sa ilang barangay. Siya maoy kuhaon nga moduyog sa novena alang sa kapistahan sa ilang barangay ug uban pang sityo  sa ilang barangay. Daghang mokuha niya aron moduyog.

“Gisultihan ka ni Sonia, Bay Lit, sa akong gipangayo, nimo?” ni Cesar buta.

“Ako nang giandam, ang imong gipangayo nako, Bay Sar, pero nahibulong ko, nganong flashlight may imong gipangayo, nga dili man ka, makakita?” sukna ni Carlito nga puno sa kahibulong.

“Tinuod nga dili ko, makakita Bay Carlito, pero hibawo ka sa akong trabaho nga magsige’g agi sa lugot hapit tanang gabii. Maayong duna koy flashlight aron makita ko sa akong matagbuan. Ug dili ko nila madasmagan,” pasabot ni Cesar.

Nakasabot si Carlito sa pinaskuhang gipangayo ni Cesar buta. (Kataposan)